Skipulagsgátt tilnefnd til UT-verðlauna
Skipulagsgátt hefur verið tilnefnd til upplýsingatækniverðlaunanna í flokknum „Stafræna opinbera þjónustan 2023“, og er meðal tveggja annarra tilnefninga í þessum flokki. Það er Ský, félag fyrir fólk og fyrirtæki í upplýsingatækni, sem veitir UT-verðlaunin en á hverju ári er valið úr fjölda tilnefninga sem er síðan raðað í fimm mismunandi flokka. Verðlaunaafhending fer fram 2. febrúar næstkomandi í UTmessunni sem haldin er í Hörpu og mun forseti Íslands, Guðni Th. Jóhannesson, afhenda verðlaunin.
Í umsögn um Skipulagsgátt segir:
„Skipulagsgátt markar tímamót í skipulagsmálum á Íslandi. Með gáttinni er í fyrsta sinn aðgengileg á einum stað öll skipulagsmál, umhverfismatsverkefni og framkvæmdaleyfi sem eru í kynningu hverju sinni, hvar sem er á landinu. Lausnin er aðgengileg og skiljanleg jafnt leikmönnum sem fagfólki. Skipulagsgátt stórbætir aðgengi og einfaldar almenningi og hagsmunaaðilum þátttöku í skipulagsmálum. Flóknir ferlar eru færðir á mannamál og nútímalegt, grafískt yfirlit yfir stöðu mála. Leit á korti eða leitarvél er einföld og aðgengileg. Lausnin er þegar komin í mikla notkun.“
Hér er hægt að skoða Skipulagsgátt .