Úrskurðir 1994 - 2006

Mati á umhverfisáhrifum lauk með úrskurði frá Skipulagsstofnun vegna framkvæmda sem voru teknar til athugunar hjá stofnuninni á árunum 1994 – 2006 á grundvelli laga nr. 63/1993 og nr. 106/2000.  Breyting á lögum nr. 106/2000 árið 2006 hafði í för með sér að mati á umhverfisáhrifum lýkur nú rökstuddu áliti Skipulagsstofnunar í stað úrskurðar.

Ástæða þess að úrskurðum er skipt í tvö tímabil er einfaldlega vegna þess að ferlin á hvoru tímabili um sig voru gjörólík.  Fyrsta kynslóð úrskurða, árin 1994-2000, fór samkvæmt því ferli að framkvæmdaraðili lagði fram frummatsskýrslu til Skipulagsstofnunar.  Stofnunin úrskurðaði að undangengnum umsögnum lögbundinna umsagnaraðila og athugasemdum frá almenningi.  Skipulagsstofnun hafði, skv. þágildandi lögum, heimild til þess í úrskurði að: fallast á framkvæmd með eða án skilyrða, leggjast gegn framkvæmd eða úrskurða viðkomandi framkvæmd í frekara mat.

Síðari kynslóð úrskurða er verulega frábrugðin þeirri fyrstu.  Samkvæmt þágildandi lögum byrjaði framkvæmdaraðili á því að leggja fram tillögu að matsáætlun.  Matsáætlun er eins og nafnið bendir til áætlun um hvaða áherslur skuli leggja í gagnaöflun og umfang þegar lagt er mat á áhrif viðkomandi framkvæmdar á umhverfið.  Skipulagsstofnun tók ákvörðun, eftir að hafa leitað álits lögbundinna umsagnaraðila og tekið við athugasemdum frá almenningi, um það hvort tillaga framkvæmdaraðila að matsáætlun væri fullnægjandi með eða án athugasemda frá stofnuninni.  Í kjölfar matsáætlunar vann framkvæmdaraðili matsskýrslu byggða á fyrirheitum matsáætlunar og lagði fram til Skipulagsstofnunar.  Stofnunin úrskurðaði að undangengnum umsögnum lögbundinna umsagnaraðila og athugasemdum frá almenningi.  Skipulagsstofnun hafði, skv. þágildandi lögum, heimild til þess í úrskurði að: fallast á framkvæmd með eða án skilyrða eða leggjast gegn framkvæmd.

Á spássíunni vinstra megin er hægt að skoða alla úrskurði frá báðum tímabilunum og einnig er hægt að skoða ákvarðanir Skipulagsstofnunar um matsáætlanir frá árunum 2000-2006.  Hafa ber í huga að tímabilin skarast, þ.e. sum ár var tvenns konar málsmeðferð í gangi.  Ástæða þessa er að í einhverjum tilfellum var málsmeðferð hafin á grundvelli eldri laga og voru því viðkomandi mál kláruð samkvæmt því ferli.