| |
Svæðisskipulag >> Nánar um svæðisskipulag
NÁNAR UM SVÆÐISSKIPULAG
Ef tvö eða fleiri sveitarfélög telja þörf á að samræma og setja fram sameiginlega stefnu varðandi tiltekna þætti landnotkunar og þróunar byggðar geta þau unnið svæðisskipulag. Stefna svæðisskipulags skal taka til minnst 12 ára og ná til alls lands viðkomandi sveitarfélaga, nema í þeim sveitarfélögum sem ná inn á miðhálendið.
Sveitarstjórnir koma á fót samvinnunefnd til að vinna að gerð svæðisskipulagsins. Hvert sveitarfélag sem stendur að svæðisskipulagsgerðinni tilnefnir tvo fulltrúa í samvinnunefnd, en Skipulagsstofnun einn fulltrúa án atkvæðisréttar. Umhverfisráðherra setur nefndinni starfsreglur að fengnum tillögum hennar. Nefndin ræður sér skipulagsráðgjafa til vinna með sér að svæðisskipulaginu. Kostnaður við svæðisskipulagsgerð greiðist til helminga af Skipulagsstofnun og hlutaðeigandi sveitarfélögum í samræmi við áðurgerðan samning milli þessara aðila.
Við gerð svæðisskipulags skal byggt á markmiðum skipulags- og byggingarlaga og fyrirliggjandi áætlunum sem varða viðkomandi sveitarfélög. Samvinnunefnd ber að vinna að svæðisskipulagi í samráði við íbúa sveitarfélaganna sem í hlut eiga og aðra hagsmunaaðila auk þess sem samvinnunefnd ber að leita til ýmissa opinberra aðila við mótun svæðisskipulagsstefnunnar.
Við gerð svæðisskipulags ber að leggja mat á umhverfisáhrif þeirrar stefnu sem þar er lögð til. Í leiðbeiningariti Skipulagsstofnunar um gerð aðalskipulags er nokkuð ítarlega fjallað um hvernig unnt er að standa að slíku umhverfismati og má hafa það til hliðsjónar við umhverfismat svæðisskipulags.
Svæðisskipulag tekur gildi þegar það hefur verið samþykkt af öllum hlutaðeigandi sveitarstjórnum og staðfest af umhverfisráðherra, en áður þarf samvinnunefnd að hafa látið fara fram kynningu á hinni endanlegu skipulagstillögu. Í skipulagsreglugerð er fjallað ítarlega um efni, framsetningu og málsmeðferð svæðisskipulags. Framfylgd svæðisskipulags er í höndum einstakra sveitarfélaga sem aðild eiga að svæðisskipulaginu. Að afloknum sveitarstjórnarkosningum skulu sveitarstjórnir meta hvort ástæða sé til að endurskoða gildandi svæðisskipulag.
Auk heildarendurskoðunar getur þurft að gera breytingar á gildandi svæðisskipulagi. Í 14. gr. skipulags- og byggingarlaga og í 7. kafla skipulagsreglugerðar er fjallað um hvernig fara skal með breytingar á svæðisskipulagi. Sjá einnig leiðbeiningablað um breytingar á svæðisskipulagi.
til baka
|
|