| |
STEFNA SKIPULAGSSTOFNUNAR
Skipulagsstofnun heyrir undir umhverfisráðherra og starfar skv. skipulags- og byggingarlögum og lögum um mat á umhverfisáhrifum. Auk markmiða þeirra laga sem Skipulagsstofnun starfar eftir hefur stofnunin sett sér eftirfarandi leiðarljós og markmið og skilgreint leiðir að þeim.
Leiðarljós
Í samræmi við stefnu stjórnvalda vill Skipulagsstofnun stuðla að umhverfisvernd og vinna markvisst að markmiðum sjálfbærrar þróunar varðandi ákvarðanir um landnotkun, mannvirkjagerð og byggðaþróun. Sú vinna byggi á lýðræðislegri og faglegri umræðu um umhverfis- og þjóðfélagsmál þar sem hagur heildarinnar og komandi kynslóða, réttaröryggi einstaklinga og öryggi, gæði og hagkvæmni mannvirkja og byggðs umhverfis eru höfð að leiðarljósi. |
| Markmið
Að nýttir séu kostir og möguleikar skipulagsgerðar á lands-, svæðis- og sveitarfélagavísu og umhverfismats til að marka framsækna stefnu um ráðstöfun lands til nýtingar og verndar með sjálfbæra þróun að leiðarljósi.
Að skipulagsáætlanir og geiraáætlanir verði samþættar og hafi efnahagslegar, félagslegar og menningarlegar þarfir landsmanna, öryggi þeirra og heilbrigði að leiðarljósi.
Að ákvarðanir um landnotkun og framkvæmdir mótist í lýðræðislegri umræðu þar sem litið sé samþætt til byggðaþróunar, landnotkunar og umhverfismála.
Að skipulagsgerð og umhverfismat gegni hlutverki við að skapa sátt um ráðstöfun lands til nýtingar og verndar.
Að innleitt verði umhverfismat við skipulagsgerð og aðra áætlanagerð um landnotkun og framkvæmdir sem líkleg er til að valda verulegum umhverfisáhrifum með það að leiðarljósi að auka gagnsæi, lýðræði og umhverfisvernd.
Að bæta grundvöll skipulagsgerðar og umhverfismats hvað varðar grunnupplýsingar og þekkingu um skipulagsgerð og umhverfismat.
Að stuðla að öflugri faglegri umræðu, rannsóknum og þróun í skipulags- og umhverfismálum til að tryggja framfarir og hagnýta nýjungar. |
Leiðir
Til að vinna að leiðarljósi og markmiðum hafa verið skilgreindar eftirfarandi leiðir sem lúta bæði að starfi stofnunarinnar út á við og að innra starfi hennar.
Skipulagsstofnun mun:
Vinna að því að þróa skipulagsgerð, umhverfismat áætlana og mat á umhverfisáhrifum framkvæmda sem tæki til að stuðla að markmiðum stefnumörkunar stjórnvalda um sjálfbæra þróun. Þar verði lögð áhersla á hlutverk skipulagsgerðar og umhverfismats varðandi lýðræðislega umræðu, heildræna sýn og samþættingu ólíkra þátta.
Vinna að þróun aðferða varðandi áætlanagerð stjórnvalda á landsvísu um landnotkun og þróun byggðar í samstarfi við umhverfisráðuneytið og aðra aðila í stjórnkerfinu.
Hvetja til umræðu og vinnu að samþættri skipulagsgerð um landnotkun og áætlanagerð um byggðaþróun, sem og til samþættrar vinnu að aðalskipulagi sveitarfélaga og staðardagskrám sveitarfélaga.
Vinna ásamt umhverfisráðuneyti að þróun löggjafar á sviði stofnunarinnar með það að leiðarljósi að skipulagsferli, skipulagsgerð og umhverfismat verði skilvirk og að verkaskipting milli ríkis og sveitarfélaga varðandi skipulagsmál verði gerð skýrari en nú er.
Vinna að því að skilgreina þarfir til grunnupplýsinga vegna skipulagsgerðar og umhverfismats, að teknu tilliti til viðfangsefna skipulags og mats og vöktunar á þeim.
Hafa frumkvæði að upplýsingamiðlun og faglegri umræðu með útgáfu leiðbeiningarefnis á Netinu og með öðrum hætti auk ráðstefnu- og fundahalds um skipulagsmál og umhverfismat. Miðla upplýsingum um hlutverk og möguleika skipulagsgerðar og umhverfismats, hlutverk sveitarstjórna og hlutverk almennings og möguleika hans til að taka þátt í umræðu og hafa áhrif á þróun byggðar og umhverfis.
Stuðla að og taka þátt í rannsóknar- og þróunarverkefnum sem miða að því að auka fagþekkingu innan og utan stofnunar og þróa aðferðir sem falla að íslensku samfélagi og umhverfi.
Í innri starfsemi Skipulagsstofnunar munum við:
Axla sameiginlega ábyrgð á starfsumhverfi okkar, starfsanda og verkum og vinna sem ein heild, skilvirkt og faglega, að viðfangsefnum stofnunarinnar.
Vinna áfram í anda þeirra "leiðarljósa í samskiptum" sem starfsfólk stofnunarinnar hefur sett sér um virðingu, jákvæðni, ábyrgð og traust og fram koma í starfsmannahandbók.
Leggja áherslu á markvissa faglega framþróun, með fagumræðu innan stofnunar og símenntun starfsfólks.
Gæta jafnréttis í hvívetna, jafnt við ráðningar og í almennri starfsemi stofnunarinnar.
Tryggja öflugt upplýsingastreymi milli stjórnenda og starfsfólks stofnunarinnar.
Endurskoða reglulega verkaskiptingu og forgangsröðun verkefna með það að leiðarljósi að stofnunin sinni lögbundnum verkefnum sínum sem best og veiti sem besta þjónustu.
Endurskoða reglulega verkferla og ábyrgðar- og samráðsskyldur með það að markmiði að stuðla að bættum árangri og nýtingu mannauðs stofnunarinnar, einföldum verkferlum, skýrri ábyrgð og gefandi samstarfi.
Fara reglulega yfir innviði stofnunarinnar varðandi skjalakerfi, gagnagrunna og varðveislu gagna til að tryggja varðveislu og auðvelda aðgengi starfsfólks og viðskiptavina að upplýsingum.
Vinna áfram að gerð langtíma- og ársáætlana og ársskýrslna í anda samþættrar árangursstjórnunar.
Nýta starfsmannasamtöl, frammistöðumat eða aðrar viðeigandi leiðir til að treysta gott starfsumhverfi, árangursríkt starf og viðhald og þróun mannauðs.
Viðhalda góðu starfsumhverfi og aðstöðu starfsmanna.
Leiðir að markmiðum eru nánar skilgreindar í árs- og langtímaáætlunum stofnunarinnar hverju sinni. |
til baka
|
|